لما دخلت اشوفه فى الرؤية الشرعيه تأكدت انه لا يصلح زوج لى ،شكله معجبنيش وحسيت بانقباض كان مبعثه انه لا يوافق تطلعاتى، كنت حاطه معايير، ومكنتش موجوده فيه ولما قعدت كنت عايزه الجلسه تخلص بسرعه وكل واحد يروح لحاله وبعد يوم او يومين نوصلهم ردنا، بس كنت مضطره اسمع منه، مركز فى شكلى ولا مظهرى وكان على وشه نفس الابتسامه إلى شفتها مية مره قبل كده كنت عارفه انه مهندس وشغال فى شركه كويسه، سلمنا على بعض وبداء يعرفنى بنفسه، مكنتش عايزه اسمع حاجه
كان نفسى احط السماعات فى ودنى لحد ما نخلص قال قبل اى تفاصيل انا امى اهم حاجه فى حياتى ،ومش ممكن اسمح لأى حاجه تزعلها ،حتى انتى نفسك، سواء حصل بينا قبول او رفض ودا من حقك هتشيلى امى فوق دماغك كنت هضحك، الثقه إلى كان بيتكلم بيها غريبه، كان نفسى اقوله يا بنى طاب بص لشكلك ،او شوف رأى الشخص التانى الأول قبل ما تحط شروطك، من حقك تحب والدتك وتحترمها وتشيلها فوق راسك لكن انت مش جاى تتجوز خدامه ،قفلت منه ومن كلامه، مراتى لازم تبقى تحت رجل امى، مراتى لازم تشوف طلباتها، والدتى هتعيش معانا
مقدرتش استحمل، قلت طيب ووالدتى هتحطها فوق دماغك! هتعيش معايا؟ منا برضه يتيمه ؟ هتشوف طلباتها ذى امك ؟ سكت لحظه وقال، هو انا هفتح شقتى فندق ؟ من حقى الاقى راحتى فى شقتى وانا مش بحب الدوشه والزحمة رفع إيده بصى ،لو وافقتى على شروطى انا هقبل بيكى تكونى مراتى. تقبل بيا مراتك؟ ايه خلاك تعتقد انى هقبل بيك اصلا ؟
مقدرتش امنع كلامى ،حسيت لو كتمت غيظى هيحصلى حاجه ، قلت انا فى العاده بمنح نفسى يوم او يومين افكر فيهم، بس احب اقلك انى رفضتك، قمت من مكانى ووالدتى قامت بسرعه وسمعت صراخه واحنا خارجين، دى مش مؤدبه ،تربية شوارع، مين الى رشحلى البنت دى ؟ كنت عايزه ارجع اضربه بالجز،مه لكن احترمت والدتى إلى ماشيه جنبى ومسنوده على دراعى ،والدتى قالت واحد تانى مرفوض ؟ قلت ايوه، انتى قولتى ايه زعلك كده اوى يا بنتى ؟
قولت متشغليش بالك يا ماما، اهم حاجه صحتك، كنت حاسه انى مخنوقه ضعيفه وسلبية ،عدم ردى على إهانته عملى عقده نفسيه ،وبعد يومين بالضبط لما رجعت من الشغل لقيت والدتى قاعده فى الصاله شارده ،بقلها فيه ايه يا ماما؟ الضغط ارتفع مره تانيه ؟ السكر مش مظبوط ؟ قالت لا انا كويسه الحمد لله، بس فيه حاجه غريبه حصلت قلت خير ان شاء الله؟ قالت الولد إلى كان متقدملك، بعت يتقدملك مره تانيه. يا تري جاي يتقدم تاني ليه ؟
ولو أنتي مكاني هتعملي ايه ؟
